TACLOBAN CITY – Igin anunsyo ha publiko han Department of Agriculture-Eastern Visayas nga an Kadiwa ng Pangulo in mage-expand na ha rehiyon, kun diin suportado naman han Department of the Interior and Local Government an nasabi nga pitad.
Panuyo naman hine nga pitad nga himuon nga mainstream an mga lokal nga pangobyernuhan nga magkamay-ada hin Kadiwa ng Pangulo agud makabulig ha mga kunsumidor sugadman ha mga parag-uma.
Sumala kan Department of Agriculture Eastern Visayas Agri-Business and Marketing Assistance Division Chief, Francis Rosaroso, target han ira ahensya nga magkamay-ada hin mga Kadiwa Stores ngan Kadiwa Center an mga LGUs ha rehiyon.
Dugang pa hine, an Kadiwa Stores in magigin temporaryo la an pagbutang ha usa nga lugar, samtang an mga Kadiwa Centers naman in amu an magigin permanente nga butang, ngan kinahanglan hine building ngan mga tawo nga magpapasilidad han operasyon.
Ha lain nga bahin, iginpahibaro naman hine nga an DA in nagdudumara hin Kadiwa ng Pangulo kada-Huwebes ngan Biyernes ha kada semana ha Palo Government Center pinaagi han pakikigbinuligay ha probinsya han Leyte ngan mga permanente nga exhibitors.
Ha bag-o nga opisina han DA in mayda gihapon Kadiwa ng Pangulo kada ha syahan nga Huwebes ngan Biyernes han bulan. (via Bombo Niña Magpili )
