-- Advertisements --
Patay an Mexican social media influencer nga hi Cesar Gastelum mahuman panmusilon samtang nagla-livestream kaupod an iya mga kasangkayan ha gawas han usa nga restaurant ha Culiacan, Mexico.
Sumala ha mga otoridad, kilala hi Gastelum ha iya comedy videos nga may haros 600k followers ha TikTok. Ha video han iya stream, makikit-an nga gindaop hira han duha nga lalaki nga sakay han motorsiklo.
Dire la maiha, nagpabuto hin pusil an driver han motorsiklo ngan naigo patay an influencer.
Ha pagkayana in padayon naman an imbestigasyon agud madakop an responsable han krimen.
Naganap an panmumusil ha butnga han padayon nga karahasan nga natatabo ha Culiacan, nga maiha na nga sentro han mga grupo nga nag-aaragaw hin kontrol ha lugar.
