NATIONAL – Ginhahangyo ni House Deputy Speaker ngan Las Pinas Rep. Camille Villar ha gobyerno nga magbutang hin mga pitad nga maga-atiman ngan magsisigurado nga maupay an estado han mental health ha sektor han edukasyon.
Duon ni Villar, importante nga siguraduhon an mental wellness o maupay nga panhunahuna han mga estudyante agud malikayan nga makaghimo an mga ini o madabi ha mga dire maupay nga pamatasan ngan buruhaton sugad hiton diskriminasyon ha mga eskuylahan ngan bullying.
Kasumpay hini in ginpahayag gihapon ni Villar ha mga eskuylahan nga kumuha hin kadugangan nga guidance counselors nga magbubuhat hin regular nga counselling consultations ngan assessment ha mental well-being ha mga estudyante.
Kaupod gihapon ha suhestyon ni Villar nga maghatag hin access ha mental health therapist services an mga eskuylahan ngan kada komunidad agud masulosyunan an nagtitikagrabe nga mental health crisis ha educational sector.
