TACLOBAN CITY– Na-araba an pipira nga mga tricycle drivers hiton syudad, partikular na an pagbabayad hin P1K kada nakakatalapas an mga ine ha trapiko.
Sumala kan Joseph Tangile,Vice President, MCH Driver Association Tacloban City, han nakalabay nga bulan hiton Pebrero tigda la nga nag-umento an penalidad, nga waray manla bisan anu nga abiso nga ginpahibaro ha ira mga mga drivers.
Dugang pa ni Tangile, han nakalabay nga semana nagkamayda hira hin dialogo kalakip an mga tinaglawas hiton trapiko han syudad, kun diin nagpatapod an mga ine nga maghihimo hira hin remedyo, kasumpay ha nasabi nga himangrawon.
Ginpaangbit hine, nga ha nasabi nga paghihimangraw waray liwat natabo nga pirmahay nga pamatuod nga maghihimo an mga ine hin pitad agud nga masolusyon an mga araba han MCH drivers.
Ginmalatumat ni Tangile, nga an nagin rason daw han pagpahitaas han penalidad ha ira nga mga MCH drivers, in matungod nga mayda usa nga driver nga nagsukot hin hitaas nga presyo hiton pamasahi, kun diin ine an ginpapatamakan nga rason kun kay-anu napagdesisyunan han mga ine nga pahitas-an iton ira penalidad.
Depensar naman hiton MCH Driver Association, dire ig-generalize an pagpatuman hiton sirot.
Nanawagan naman ine ha iya igkasi-drivers nga magin tangkod ha pagsukot hiton pamasahe ha mga pasaheros, ngan dire maningabot tungod nga nakakagkawsa ine hin penalidad.
