TACLOBAN CITY – Gin abuyunan ni Ormoc City Mayor Richard Gomez an pagbuhi ha death penalty para hadton mapapamatud-an han korte nga guilty ha pagbuhat hin heinous crime.
Ha usa nga interview, ginpahayag ni Gomez nga importante an pagbuhi han death penalty ilabi na kon may kalabutan ini ha illegal nga droga.
Gindig-unan han alkalde nga kaangayan la sentinsyahan hin kamatayon adton mga drug pushers, traffickers ngan drug lord nga nagruruba han kinabuhi hiton damo nga mga Pilipino.
“I really want death penalty back for drug pushers and drug traffickers, it is very important otherwise mahihirapan tayo na bawasan ang problema sa drugs. You really have to kill them, ganun ka-basic yun”, pahayag ni Gomez ha media interview.
Kon mababaruan titikangan na an debate kasumpay ha pagbalik han death penalty ha pipira nga mga heinous crimes ha House committee on justice yana nga maabot nga Miyerkules, Agosto 5.
Iton House panel in nag-schedule hin hearing para han maabot 12 nga death penalty bills nga ginfile ha lower chamber mahuman nga hangyuon ni Presidente Rodrigo Duterte ha mga magbaralaud nga ig-reinstate an capital punishment pinaagi hin lethal injection para ha drug-related crimes ha iya ikalima nga State of the Nation Address dida han nakalabay nga Hulyo 27.
Mababaruan nga gintanggal na ha 1987 Constitution ini nga capital punishment pero gintutugan hini iton Kongreso nga igbalik ini ilabi na kon magigin sirut ini ha heinous crimes.
An death penalty in ginbuhi dida han administrasyon ni President Fidel Ramos han Disyembre 1993 pinaagi han Republic Act (RA) 7659 nga gin-adopt han Kongreso pero gintanggal ini ha liderato ni anay President Gloria Macapagal-Arroyo.
Nagpatapod naman an pipira nga myembro han House of Representatives nga magkaada hira hin mahugot nga deliberasyon kasumpay han proposed death penalty bills, kon diin karuyag nira ini magin balaud san-o paman mahuman an termino ni Presidente Duterte
