TACLOBAN CITY – Ginpatapod ni Ormoc City Mayor Richard Gomez nga igduduso hiton iya administrasyon an panibag-o nga waterwork system project kumo solusyon ha dekada na nga problema ha kakulangan han suplay hiton tubig ha syudad.
Sumala hiton alkalde, nakipanghimanghraw na hira ha mga bangko para makautang hin P2-billion para hini nga proyekto, mayda na gihapon hira business model ngan padayon iton ira pakikipagsumpayan ha Department of Finance ngan paghikay han pipira pa nga mga kinahanglanon nga dokumento.
Madalagan iton proyekto ha sakob hin 25 katuig nga kon makumpleto in magkakaada na hin supresyente nga suplay hin tubig iton 110 nga mga barangay han syudad.
Ha pagkayana in mayda 26 nga existing pumping stations iton Ormoc ngan mayda ini 23,000 nga mga water concessionaires pero diri maabot ha 70 porsyento ha kabug-usan iton nasusuplayan hini.
Iton Lake Danao naman nga primero nga source hin tubig han pito nga munisipyo han Leyte kaupod na an syudad han Tacloban in diri pa nagagamit ha pagsuplay hin tubig haira dapit.
Sanglit ha P2-billion nga water system project in kakalakipan han pagdevelop ha Lake Danao kumo bag-o nga water source; pagtindog hin upat ka units hin concrete ground reservoirs nga magseserbi kumo pressure breakers ngan water storage; ngan pagtindog hin 90,000 cubic meters per day nga water-treatment plants.
Mababaruan nga mahuman nga umigo an makusog nga linog ha Ormoc han 2017, naruba iton ira water system, usa nga rason nga nakakaeksperensiya hin kakulangan hin tubig an mga molopyo.
Han 2017 gihapon umaro hin bulig hi Gomez ha central government para pondohan hin PHP2-billion an ira comprehensive master plan waterworks system pero waray la gihapon ini kahahatag bisan pa kon naaprubahan na ini ha ginbuhat nga Regional Development Council Meeting ( RDC ).
