Mahuman nga magbul-iw kumo special adviser han Commission for Infrastructure (ICI), igindiwara ni Baguio City Mayor Benjamin Magalong an mga nagkokonekta ha iya ha korapsyon ha syudad.
Ha usa nga pahayag, ginmalatumat ni Magalong nga mabug-at an iya desisyon para bumaya ha ICI pero ine daw an kinahanglan agud mapabilin an kredibilidad han komisyon.
Gintagan-duon pa han alkalde nga waray hiya hibabruan ha kwestyunable nga proyekto ngan waray “conflict of interest” ha iya pagkakatudlok ha ICI.
Kadungan han pagbubul-iw ha pwesto, nahipatik an pagkakadabi ni Magalong ha duha nga proyekto pan-imprastraktura ha syudad han Baguio dida han 2022 ha contractor couple nga hira Pacifico ‘Curlee’ ngan Cezarah ‘Sarah’ Discaya.
Kasumpay hine, ginsuspendi gihapon ni DPWH Secretary Vince Dizon an unom nga opisyal han Baguio City District Engineering Office.
Syahan na nga iginmando ni Magalong an bulag nga imbestigasyon tikang ha Sangguniang Panlungsod han Baguio para ha mga proyekto nga nadelatar sugad han tennis court ngan parking lot ha Burnham Park.
Ha iya katapusan nga pahayag, nanawagan ni Magalong ha mga Pilipino nga dire pabay-an nga kawaton han mga korap nga opisyal an kabubwason han mga kabataan ngan kabubwason han nasud.
