TACLOBAN CITY – Maabot ha 200 nga mga katawhan an nagdumara hin mass rally ngan vigil ha bungto han Hilongos Leyte kumo pagpakita han ira kasinahon ha nahitabo nga pagpatay han usa nga kapitan nga gin-ako han mga miyembro han New People’s Army (NPA).
Sumala kan Lt. Col. Roberto Obaob, Commanding Officer han 78th Infantry Battalion, nga panuyuan han mao nga mass rally nga maipakita an ira pagsukna ngan pagkondina han brutal nga pagpatay kan Virgilio Lucwas, kapitan han Brgy. San Antonio, Hilongos Leyte nga waray man unta ginbubuhat nga sayop kundi pagtuman la han iya responsibilidad kumo opisyales han ira barangay.
Kaupod ha mga nagdumara han mass rally ngan vigil an mga residente han mao nga barangay ngan sugadman han mga katharani hini nga lugar.
Mahinunumduman nga nangingisda la an biktima kaupod an iya mga paryente han tigda nala nga may dumaop nga mga armado nga kalalakin-an ngan nagpakiana kun hino an kapitan ngan dayon nga ginpanmumusil ini.
