Gin sigurado ni Executive Secretary Ralph Recto nga papadakuon pa han administrasyon ni Presidente Ferdinand Marcos Jr. an pondo ngan suporta para ha mga lokal nga pangobyernuhan agud mapalaksi an paghahatag hin serbisyo ha publiko.
Gin malatumat ni Recto nga maabot ha haros P1.4 trilyon an National Tax Allotment (NTA) han mga local government unit (LGU) ha 2027, pinakadako ha kasaysayan han nasud.
Ha nasabi nga kantidad, P448.70 bilyon an mahingangadto ha 1,491 munisipalidad, samtang P303.56 bilyon an ig aalutaga ha mga probinsya, P263.97 bilyon ha mga barangay, ngan an nasasalin in ha mga syudad.
Labot pa hini, nakaalutaga gihapon an P58.53 bilyon para ha Local Government Support Fund (LGSF) ha ilarom han panukala nga 2027 national budget. Ini na gihapon an pinakadako nga alokasyon para ha LGSF.
Sumala kan Recto, gagamiton an pondo para ha mga proyekto sugad han karsada, farm-to-market roads, water systems, health facilities, ngan mga establisyemento nga pwede himuon nga evacuation centers.
Kaupod gihapon ha mga programa nga ginsusuportahan han LGSF an panhatag hin 10 kilos nga libre nga bugas kada duha kabulan ha haros walo kabilyon nga pamilya.
Dugang pa ni Recto, pinasimple na gihapon han gobyerno an proseso han pag-aro han LGSF agud maibanan an rekisitos ngan mapalaksi an pagpagawas han pondo.
Ginsigurado hini nga papahalawigon pa han gobyerno an suporta ha mga LGU nga mayda mga programa nga epektibo nga nakakabulig ha mga molopyu.
