Plano han House prosecution panel nga hangyuon ha Senate Impeachment Court agud mag-isyu hin subpoena ha indibidwal nga nagnga-ngaran nga “Mary Grace Piattos” agud umatender ha impeachment trial ni Vice President Sara Duterte.
Ginmalatumat ini ni House prosecution counsel Atty. Lorna Kapunan ha usa nga ambush interview, pero ginklaro hini nga dire pa nira nabibiling hi Piattos, nga usa ha nakakarawat han payouts tikang ha confidential funds han Office of the Vice President ha ilarum ni VP Sara Duterte.
Waray gihapon ginpaangbit han abogado kun san-o posible ipa-subpoena hi Mary Grace Piattos, pero kun tugutan han korte an pag-isyu han subpoena, ini in igpapadara dayon ha buhatan han OVP ha Mandaluyong City.
Hi Mary Grace Piattos in kaupod ha nakalista nga testigo han prosekusyon para ha impeachment trial han bise presidente, basar ha pre-trial brief.
