TACLOBAN CITY- Guindiwara han Mayor han Marabut, Samar nga panag-iya han Local Government Unit (LGU) an nakumpiska nga 15 kabug-os hin de kalibre nga pusil nga nakakarga ha ira bus samtang nga nakasakay ha roro vessel.
Ha guinbuhat nga pakipaghimangraw han Bombo Radyo Tacloban kan Marabut Mayor Elizabeth, guinklaro hini nga panibag-o la nga palit an mao nga bus tikang ha Cebu ngan igdedeliver unta tipakadto ha Ormoc para mapaabot ha munisipyo han Marabut.
Guinyakan ni Mayor Ortillo nga diri ini maaram kun hin-o an nagtatag-iya han mao nga mga pusil sugad man guinkakapausa guihapon hini kun kay ano nahingadto ha bus an mga ini ngan kun tipaunanhon nga nakahibaro an mga pulis ha namumutangan han mga de kalibre nga pusil.
Una naman nga guinpahayag hini nga waray rason para pumalit an LGU hin mga pusil mahitungod nga waray daw ini nakakarawat na hulga ha kinabuhi.
Samtang, guinpahayag naman hini nga inosento an mga naaresto nga duha nga driver han bus nga hira Joel Pedrosa, 45 anyos an pangidaron ngan Herman Gagmatan, 31 anyos an pangidaron ngan pareho mga residente han Marabut, Samar.
An kaparte han pamahayag ni Mayor Elizabeth Ortillo han Marabut, Samar
Ha pagkayana, nagpapadayon pa an imbestigayon han mga otoridad ha mao nga panhitabo.
