Ginbaribaran ni Senator Bam Aquino an plano han Department of Trade and Industry (DTI) nga pag-iisyu hin mandatory permits ha ngatanan han advertisements ngan sales promotions ha mga gudti nga negosyo.
Duon ni Aquino, magigin pabug-at ini ha mga small businesses ngan online sellers nga nakukurian ha krisis han lana ngan hitaas nga operation costs.
Ha ilarom han Department Administrative Order (DAO), ginpapakuhan hin permit ngan ginpapagpasa hin aplikasyon an mga negosyo hin dire maubos ha 30 working days ugsa tugutan nga makagpagawas hin advertisements sugad han digital ads, sponsored posts, videos, billboards, ngan promotional campaigns.
Sakop hini an parehas tradisyunal ngan digital advertising platforms kun maipapatuman.
Duon ni Aquino, dire pa man nakakabakdaw an mga gudti nga negosyon tikang ha epekto han oil crisis in papahamtangan na liwat an mga ini hin panibag-o nga pas-anon.
Nagpahimatngon an senador nga makakaapekto ini ha marketing ngan promotional campaigns agud magpabilin nga competitibe an mga negosyo ngan posible nga mahingadto ha pag-atras han mga negosyante mahitungod dugang nga gastuson.
