Igin anunsyo han Philippine Airlines dida han Hwebes, Oktubre 29, an mandato hini nga magpasa hin usa nga passenger attestation para ha mga pasaheros nga mapakadto ha United States kumo pagpapamatuod nga dire hira nagtikang o pumakadto ha Democratic Republic of the Congo ha sulod han nakalabay nga 21 kaadlaw ugsa an ira boarding.
Ini in magigin epelktibo tinikangan ha Nobyembre 3, 2026, han alas-11:59 han gab-i.
Sakop hini an mga pasaheros nga sumulod o umagi ha nasabi nga nasud pinaagi han kalangitan, tuna, o dagat, magin an mga transit passenger o an mga nag-layover ha paluparan han Democratic Republic of the Congo hin dire nagawas ha eroplano o terminal.
Subay ini ha iginpatuman nga mando han U.S. Centers for Disease Control and Prevention (CDC) kasumpay ha padayon nga paghitaas han kaso han Ebola virus ha Congo ngan agud masigurado na gihapon nga talwas ha anuman nga hulga ha panlawas an ira estado.
An mga pasaheros nga dire makakagpasa han CDC attestation in dire tutugutan nga makasulod ha nasud.
Sakop han nasabi nga patakaran an ngatanan han pasaheros, anuman an ira nasyunalidad. Kinahanglan gihapon nga bulag an attestation para ha kada pasaheros ha kada flight.
Samtang, pwede naman batunon han kag-anak o hin-o man nga otorisado nga indibidwal an form ha ngaran han mga pasaheros nga waray pa 18-anyos an edad, o mga pasaheros nga mayda pisikal o mental nga kapansanan.
Magpapabilin nga mayda bisa an nasabi nga patakaran kutob Disyembre 18, 2026, labot nala kun babawion ini han US CDC.
.jpg "PCO, pahuhugton an pakikigbinuligay ha media kontra fake news")
