SAO PAULO, BRAZIL – Usa nga pag-aram an nagpapahayag nga an moringa oleifera, nga kilala kumo “miracle tree,” in posible nga makabulig ha pagtanggal han microplastics ha inumon nga tubig.
Subay ha research nga gindumara han mga siyentipiko tikang ha Brazil’s Institute of Science and Technology of São Paulo State University, an extract hini tikang ha liso han malunggay in nakakapagtanggal hin kutob 98% han microplastics ha tubig tikang ha gripo.
Gumamit an mga researchers in saline extract tikang ha liso han malunggaw ngan ginprubahan ini ha kontaminado nga tubig. Nagana ini pinaagi han coagulation, kun diin ginpapatay an negative charge han microplastics sanglit nagbubug-os bug-os an mga ini ngan madali ma-filter.
Subay ha pag-aram, an resulta in kaparehas han epekto han mga chemical coagulants sugad han aluminum sulfate, pero an malunggay in natural, biodegradable, ngan dire toxic.
An malunggay in komon nga naturok ha tropical region ngan maiha na nga ginagamit kumo pagkaon, tambal, ngan simple nga water purifier mahitungod ha natural hini nga proteins nga nakapot ha mga impurities.
Sugadman, nagpahimatngon an mga eksperto nga kinahangla pa hin mas damo nga panginano ugsa ini magamit ha dako nga water treatment systems, mahitungod nga posible makaapekto an kalidad han tubig ngan proseso ha bisa hini.
Ha kaluyo hini, ginpapahayag han pag-aram nga posible magin importante nga parte an malunggay ha pamiling gin solusyon ha nagtitikaduro nga problema han microplastics pollution ha tubig ngan kalibungan.
