TACLOBAN CITY – Ha panuyo nga maserbisyuhan hin libre an mga pobre ha ira mga medikal nga panginahanglan, gin-abrehan na an ikaupat nga Malasakit center ha probinsiya han Southern Leyte.
Ini in pangunahan ni Special Assistant to the President Christopher Bong Go kaupod hi Southern Leyte Governor Christopherson Yap.
Gin-aghat ni Sec. Go an mga lokal nga opisyales nga ipahamtang ha publiko an mga benepisyo nga makukuha han mga ini ha mao nga Malasakit Center kun diin amo na ini an ikaduha nga pasilidad ha rehiyon labot la ha Eastern Visayas Regional Medical Center (EVRMC) Malasakit Center.
Ini naman an ikapito nga center nga gin-abrehan ha bug-os nga Pilipinas.
Sumala kan Go, prayoridad han mao nga malasakit center an mga senior citizens ngan persons with disabilities (PWDs) ngan tanan nga mga pasyente nga nanginginahanglan ngan waray na ini damo pa nga resikitos.
Dugang pa hini nga magsisirbi ini nga one stop shop han Department of Social Welfare and Development (DSWD), Department of Health (DOH), Philippine Charity Sweepstakes Office (PCSO), Philippine Amusement and Gaming Corp. ngan Philippine Health Insurance Corp.
Ginturn over gihapon hini an P5 million kumo suporta han hospital operation tikang ha Office of the President.
Samtang, mapasinalamaton naman hi Southern Leyte Governor Christopherson Yap yana nga mayda Malasakit Center ha ira lugar kun diin personal daw ini niya nga ginhangyo kan Presidente Rodrigo Duterte han pagbisita hini ha ira probinsya han nakalabay nga mga bulan.
Dugang pa hini nga mayda na nira gingagamit gihapon nga coaster para ha pagkuha han mga pasyente labi na gud adton mga tikang ha tay-aw nga lugar.
Sagot na gihapon han ospital an tanan nga garastusan han mga pasyente.
