NATIONAL – Tahasan nga tinawag han Malakanyang nga makasarili hi Vice President Sara Duterte mahuman nga igpahayag hine nga dire na niya karuyag buligan hi Presidente Ferdinand Marcos Jr. ha panuyo hine nga maibaligya an bugas ha P20 kada kilo.
Ginpahayag manggud ni VP Sara nga mayda hiya nahibabaruan nga pamaagi agud maibaligya hin P20 kada kilo an bugas pero dire karuyag igpa-angbit.
Kumo baton ha pahayag, ginmalatumat ni Palace Press Officer ngan PCO USec. Claire Castro nga baga-baga hin bata an nagin gios ni Vice President Sara.
Sumala kan Castro, dire usa nga playground an gobyerno para ha mga ‘isip-bata’ nga kaparehas han bise presidente.
Duon pa ni Castro, ha nagin aksyon hine, nagawas an tinuod nga katawuhan ngan kolor hine kumo public servant—nga usa nga makasarili.
Gintagan-duon ni Castro nga an kaupayan han mga molupyo an kinahanglan nga magin prayoridad, labi na nga damo nga mga Pilipino an nakukurian nga pumalit hin pagkaon bisan pa kun barato an bugas.
Kinahanglan daw nga huna-hunaon han bise presidente nga an pagseserbisyo ha nasud in dire usa nga mulay sanglit dire ine dapat mag gios-bata.
