Gin sigurado han Malakanyang nga andam an gobyerno ha anuman nga posible nga kalamidad o krisis nga posible ma-eksperyensyahan han nasud.
Ini an pahayag ni Palace Press Officer Undersecretary Claire Castro han pakianhan kasumpay ha kaandaman han Pilipinas ha butnga han mga pitad han pira nga nasud nga ginpapag-andam an ira mga molupyo hin pagkaon, tubig, ngan iba pa nga pangunahon nga panginahanglan para ha emerhensiya.
Sumala kan Castro, kaparte han ginbubuhat han gobyerno an pangandaman agud masigurado nga makakabaton ini ha anuman nga posble mahitabo.
Sugadman, waray na maghatag hin detalye an opisyal kun ano nga mga posible nga sitwasyon an gin aandaman han gobyerno ngan kun ano-ano nga pitad an ginbubuhat hini.
Kaupod ha mga nasud nga nagpahinaumdom ha ira mga molupyo nga mag-andam hin mga pangunahon nga panginahanglan para ha emerhensiya an United States, United Kingdom, Japan, ngan Australia.
