TACLOBAN CITY – Nagbalyuay hin asawa an duha nga magpare matungod la hiton mga uru-irignom pero, an tagsa pamilya hini in malipayon na ha kada tagsa.
Sumala han nagpakilala nga Jun, matungod nga pirmi nadayo an iya pare ha ira panimalay agud makigtagay, didto na nakahigayon nga magkabalyuay hin numero an iya misis ngan an iya pare ngan naging magtextmate an mga ini tubtob nga nagkapalagayan hin loob an duha.
Naging masulub-on hi Jun han mabaruan an ginbuhat han iya misis ngan han iya pare, pero waray daw hiya magtanom hin kasinahon ha duha tungod nga amo man gud talaga an kinabuhi mayda ginmamalas ngan mayda ginsuswerte ha paghigugma.
Matungod nga masulub-on gihapon an asawa han iya pare, in didto na hira nagkahimangraw ngan nagbalyuay han ira tagsa gindadara nga problema tubtob nga nagkadevelopan na gihapon hira ha kada usa’t-usa.
Gin-uyaban ni Jun an misis han iya pare matungod nga na-attract na gihapon hiya ha iya madi.
Naging mag-uyab an duha tubtob nga maging mag-asawa na hira.
Pahayag pa ni Jun nga bisan kumplikado an ira sitwasyon ngan damo gihapon an nasukna ha ira paghigugmaay han iya madi in waray hira magpaalantad ha mga iristorya han mga ini kontra ha ira.
Ha pagkayana, malipayon an pamilya ni Jun kaupod an iya madi nga naging misis na niya sugadman an iya pare ngan an iya anay misis ha usa’t-usa.
