Ginbay-og hin magnitude 7.4 nga linog an baybayon han estado han Chiapas ha Mexico, rason agud magpagawas hin tsunami warning an mga otoridad ngan maabat an pagbay-og ha Guatemala ngan El Salvador.
Subay ha United States Geological Survey (USGS), umigo an linog ha kahirani nga bungto han Puerto Madeo ha ilarom ha sobra-kulang 10 kilometro.
Kasunod han pagbay-og, nagpagawas an US Tsunami Warning System hin pahimatngon nga posible magkamay-ada hin tsunami waves ha mga baybayon nga ada ha sulod han 300 kilometros tikang ha epicenter han linog.
Ha Guatemala City, nahipatik nga makusog nga gin abat an linog agud malaksi nga magbakwit an pira nga resdiente pagawas han ira mga panimalay.
Subay ha report, nagdumara gihapon hin evacuation an mga empleyado ha usa nga establisyemento han gobyerno kumo kaparte han iginpapatuman nga safety protocols.
Inabat gihapon an pagbay-og ha El Salvador hin mayda sakto nga kakusog ha bungto han ira estado, pero waray pa naman nahipapatik nga dako nga danyos o ruba.
Padayon naman nga ginbabantayan han mga otoridad an sitwasyon samtang gindudumara an assessment ha mga posible nga epekto han linog.
