Diri makatood an duwa nga magbugto ha India nga an ginpalit nira nga birthday cake an magtatalwas ha ira ha leopard.
![](https://img.bomboradyo.com/tacloban/2021/07/Leopard-23-Sri-Lanka-Inger-Vandyke-1024x683-1.jpg)
Storya han magbugto nga Firoz ngan Sabir Mansuri, lumakat hira ha balay para pumalit hin mga ig aandam para ha usa nga birthday celebration.
Magkaangkas hira ha motorsiklo.
Mahuman pumalit hin birthday cake, umuli na an magbugto. Mahinay an pagpapadalagan nira samtang ginbabaybay an mabato nga agi-anan pakadto ha ira balay ha Madyha Pradesh.
Han tigda nga lumutaw an leopard nga ira naagi-an. Nagtikang ini ha tanoman han tubo.
Tungod mahinay an ira pagpapadalagan, gin abtan hira han leopard.
Ginkamras hini an nakaangkas nga hi Sabir nga han una in kapot an birthday cake. Naka eskapo hi Sabir ha kamras han leopard.
Utro nga sumalakay an leopard ngan ha higayon nga ini, nasantop han magbugto nga kinahanglan na nira nga pumili; kun an cake o an ira mga kinabuhi.
Nagdesisyon hi Sabir nga igbalbag an karton han cake ha leopard ngan naigo ini ha ulo.
Nakalasan an leopard han maigo hiya han kahon han cake amu nga kumaripas la ini hin dalagan paharayo.
Iginsumat han magbugto ha mga pulis an mao nga panhitabo. Ha syahan in diri natood an mga pulis pero han makitan an bakas han leopard ha crime scene didto nala hira nakumbinsir an mga ini.