TACLOBAN CITY – Patay an usa nga maestro mahuman nga pagbun-on han usa nga estudyante ha Brgy Sulod, Basey, Samar.
Sumala kan PMSSgt. Jerry Vargas, imbestigador han Basey Municipal Police Station, ginkilala an biktima nga hi George Lauron Varsana, 32 anyos an pangidaron, senior high school teacher han Basey National High School samtang an suspek in ginkilala kan Kurt Lancanan Apolinar, 19-anyos, senior high school student ngan residente han Brgy. Lawaan Basey Samar.
Nagawas ha imbestigasyon han mga kapulisan nga nag iinom-inom daw an biktima ngan suspek kaupod an usa pa nira nga sangkay han tigda nala nga pagbun-on an biktima han suspek.
Gindara pa ha ospital an biktima pero naawatan naman ini hin kinabuhi.
Samtang, boluntaryo naman nga nagsurender an suspek mahuman an insidente.
Ha pagkayana, padayon an gindudumara nga imbestigasyon han kapulisan agud mahisabtan an motibo ha krimen.
