TACLOBAN CITY – Gin aaghat han ahensya han Department of Trade and Industry an publiko nga ig promote, suportahan ngan tangkilikon an mga produkto nga nag tikang ha probinsya han Leyte mahitungod nga an mga produkto ha rehiyon in parehas kaupay ha iba nga mga rehiyon ngan mga imported goods.
Pangunahon nga panuyuan han ahensya in makahimo hin mga produkto nga Made in Leyte. Kun diin, yana nga tuig-2025 an pangunahon nga nakadukot nga mga aktibidad han nasabi nga ahensya in suportahan an mga produkto nga nag tikang ha probinsya.
Sumala kan Department of Trade and Industry Chief, Business Development Division, Pedro ‘Bimbo’ B. Tan, oras na agud an mga produkto hiton Leyteño an makilala ngan magkagawas ha iba nga lugar, rason gihapon han pagkakamay-ada yana hin iba-iba nga mga aktibidad ha mao nga ahensya.
Usa ha mga gin paplanuhan nga mga aktibidad yana nga tuig in an “Provincial Coconut Creations Trade Fare”, nga pag susundan han “Layag Leyte Trade Exhibit” ha bulan hiton Oktubre, an “Business Week Trade Exhibit” nga pag bubuhaton ha syudad hiton Ormoc, samtang ha bulan naman hiton Nobyembre in pagbubuhaton an “Layag Leyte Christmas Trade Fare” ha syudad hiton Tacloban,
Gin malatumat pa ni Tan nga usa ha pinakadako nga pagbubuhaton nga aktibidad han ahensya in an “Regional Trade Fare: Tubahandi” nga pagbubuhaton yana nga Oktubre 9-13 ha usa nga mega mall kun diin ginlalauman an 31 nga mga major producers han mga produkto han Leyte an matambong agud ig baligya an ira mga produkto.
Dugang pa hini, target han nasabi nga ahensya an P14-M nga sales para hini nga extravaganza.
Gin sigurado naman ha publiko ni Tan nga an mga produkto nga igigin baligya ha mga Micro Small and Medium Enterprise (MSME) in mga produkto tikang ha subra 100 nga exhibitors in mga Leyteño sugad man an majority han mga producers ngan an pinakadako hin sales kada tuig in tikang ha probinsya han Leyte. (via Bombo Niña Magpili)
