TACLOBAN CITY- Maabot ha 42 nga stalls hin utanon ngan mga grocery an naugbaw tikang ha natabo nga sunog ha Burauen Public Market.
Sumala kan P/Major Margarito Salano, Tagapagyakan han Leyte Police Provincial Office,nga nagtikang an sunog ha merkado publiko han Burauen partikular ha mga vegetable ngan canned section.
Dugang pa hine nga usa nga concerned citizen an dumalagan ha BFP Burauen para igpasabot an mao nga sunog.
Padayon naman an imbestigasyon han mga otoridad kun ano an gintikangan han mao nga sunog.
Samtang nangaro naman hin dispensa an alkalde han Burauen matungod nga igbabalhin la anay an pira nga mga magtirinda nga apektado han kasunog han merkado publiko han Burauen,Leyte.
Sumala kan Mayor Juanito Renomeron han Burauen Leyte, nga igbabalhin la anay nira ha old public market an mga magtirinda nga apektado.
Dugang pa han mao nga alkalde na ira anay sisiguraduon an katalwasan han bug-os nga merkado sugadman an mga kahigrani hine nga building san-o naman pabalikon an mga magtirinda.
Ginpahayag gihapon han mao nga alkalde nga kinahanglan mangud siguraduon iton katalwasan han mga magtirinda san-o naman ine nira tugutan nga bumalik.
