TACLOBAN CITY – Nakatalaan nga magdumara hin paghimangraw an Local Housing Board kasumpay han pagbawi ha mga units nga mga pabahay ha Norte han tacloban nga diri ginpapan ngukyan han mga benepisyaryo.
Sumala kan Ted Jopson, tagmangulo han City Housing and Community Development Office (CHCDO), base ha ira gindumara nga monitoring nadiskubrehan nga maabot ha 500 nga mga housing units an diri ginpapan-ukyan han mga benepisyaryo tikang han ma i-award ha ira an mao nga pabalay.
Labot la hini may pipira gihapon nga ginpaparentahan an ira mga pabahay ha mga indibidwal nga taga iba nga bungto – nga usa ha mahugot nga ginbabawal.
Ginklaro naman ni Jopson, nga diri basta basta an pagbawi han housing tungod may proseso gihapon hira nga kaylangan sundon sugad han paghatag hin surat ha beneficiary kun diin papag eksplekaron ini kun anu an rason han diri pag ukoy ha pabahay ngan dida na magdedesisyon an City Housing kun ini in dapat ba nga bawi-an o diri.
Samtang nagtotoo naman ini nga ha pagpapadayon pa han ira monitoring ha tanan nga resettlement sites ha Tacloban mas madudugngan pa an ihap han mga matatanggalan hin pabalay tungod nga diri gin uukyan.
