TACLOBAN CITY — Narekober an maabot 34 nga mga assault riffles nga gintutuohan tikang ha New People’s Army (NPA) ha usa nga tay-aw nga lugar ha Pinabacdao, Samar.
Mayda nakuha nga mga impormasyon an mga kasundaluhan bahin hiton kinamumutangan han nasabi nga mga armas nga dayon ginrespondihan han mga otoridad.
Sumala kan Cpt. Ryan Layug, Spokesperson Division Public Affairs Office han 8th Infantry Division, an mga narekober in 24 units han M16 rifles, 2 units han M4 carbine assault rifles, 7 units han China-made AK47 variant rifles ngan 1 unit han M14 rifle.
An nasabi nga mga armas in gintutuohan nga gintatago ngan ginbabayaan hiton walhon nga grupo kun diin waray na an mga ini kapas nga magdara hin mga armas ha ira pag eskapo o pagbalhin ha iba nga kampo.
Mapasinalamaton naman ini ha ngatanan nga residente ha nasabi nga lugar nga padayon an pagtapod ngan paghahatag hin impormasyon ha mga otoridad kabahin hiton mga ginhihimo han mao nga rebelde nga grupo.
