TACLOBAN CITY – Maabot na ha 100 an ihap han mga empleyado han Eastern Visayas Regional Medical Center (EVRMC) an nabakunahan na kontra COVID-19.
![](https://img.bomboradyo.com/tacloban/2021/03/DOH-ev-chd-health-promotions.jpg)
Una hini, umulpot ha rehiyon kakulop nga adlaw an syahan nga batch han Sinovac vaccine nga gindistribwer ha tulo nga mga ospital kaupod na an EVRMC, Divine Word Hospital ha Tacloban ngan Schistosomiasis Hospital ha Palo.
Sumala kan Dr. Salvador Evardone, Chief of Hospital han EVRMC, hiya an pinakasyahan nga nagpaturok han mao nga bakuna kakulop ngan ha pagkayana in waray naman hiya naabat nga reactions o side effects han bakuna.
Mayda naman duduha nga empleyado han ira ospital nga ginbakunahan gihapon kakulop nga nakaabat hin pagkalinop ngan pamamalhas pero ginklaro ni Dr. Evardone nga an mga ini in normal la nga reaksyon han lawas ha bakuna nga ginturok.
Ha kabug-usan in naging hapsay an vaccination rollout ha EVRMC kakulop nga adlaw ngan waray may nahipatik nga adverse event o epekto han bakuna.
Gin-aghat naman hini an publiko nga dire mahadlok nga magpabakuna kontra COVID-19 tungod nga sigurado nga talwas an igtuturok nga bakuna.
Samtang ha pagkayana in nadugngan na an ihap han mga empleyado han EVRMC nga nagsignify nga andam nga magpabakuna.
Tikang ha dati nga 541 nga ihap, yana in sobra 700 na an ada ha ira listahan han mga empleyado nga tuturukan han bakuna.