TACLOBAN CITY – Mahuman an pira kaadlaw tikang han implementasyon han bago nga pamasahi ha bug-os nga nasud dida han Oktubre 3 dinhi ha Sinirangan Bisayas in aada pala ha 25% an nagkuha pala han Fare Matrix ha LTFRB Region 8.
Sumala kan Veronica Reposar tagapagyakan han Land Transportation Franchising and Regulatory Board Regional Office-8, diri manggud pwede nga manukot hin bago nga pamasahe an usa nga PUV’s kun waray pa hini nga Fare Matrix.
Dugang pa ni Reposar nga ha takna naman nga mayda na Fare Matrix an pampasahero nga sarakyan in puydi na hira magdumara hin fare increase in labi na kun nakaplastar o nakadikit ngan nakikita ini han publiko nga manarakay.
Mayda gihapon penalidad para ngadto han mga drayber han pampubliko nga sarakyan nga nagpapatuman na han fare increase bisan paman waray ini nga fare matrix nga kun diin an penalidad in aada ha 5,000 ka pesos para han 1st offense, 10,000 pesos naman para han 2nd offense ngan 15,000 ka pesos para han 3rd offense ngan kanselasyon han franchise mahitungod nga ini in makokonsidera nga overcharging.
Ginpasabot gihapon hini nga mayda bayad an pagkuha han fare matrix ngan sugad man gihapon nga nananawagan hiya ha pampubliko nga mga drayber nga kumuha na han mao nga matrix.
