TACLOBAN CITY– Naka heightened alert status na bug-os nga han-ay hiton kapulisan han Leyte Police Provincial Office (LPPO), kasumpay hiton pagdudumaraon nga Undas 2025.
Sumala kan Leyte Police Provincial Office, Information Officer PCPT. Hazel Vacal, andam na hira para ha pandeploy han ira mga tinaglawas, ha mga sementeryo agud nga mag-asister ha mga mabisita nga mga katawhan.
Dugang pa hine, lain la ha mga sementeryo, magpapasarang gihapon hira hin mga tinaglawas ha mga pantalan, terminals, ngan magin ha mga paluparan.
Ginlalauman na mangud han ira han-ay, nga madamo an mga pasaheros nga mangunguli ha ira tagsa-tagsa nga probinsiya ngan kinahanglan nga mamintinar nira an kahimyang sugadman an seguridad han mga ine.
Ginpapagbawal naman nga magdara hin mga magtarom nga hinganiban ha sulod han sementeryo, sugadman an pagdara hin makahurubog nga irimnon.
Nanawagan naman ine ha publiko, nga makigkooper ngan magsunod ha mga ginpapatuman nga aludayday agud nga magkamayda hin mahimyang nga Undas 2025.
