TACLOBAN CITY – Ginduduso ha pagkayana ni Tacloban City Mayor Alfred Romualdez nga magin usa nga Lone District an syudad han Tacloban.
Sumala hini nga ha kaluyo han pagigin Highly Urbanized City hiini ha sakob han 16 ka-tuig, nagpapabilin la gihapon nga diri pa nakokonsidera kumo Lone District an nasabi nga syudad.
Dugang pa ni Romualdez, nga maiha na niya nga gin aaro kan Speaker Ferdinand Martin Romualdez nga himuon na nga Lone District of Leyte an syudad hiton Tacloban agud magkamay-ada ini hin kalugaringon nga Congressman ngan kalugaringon nga pondo an syudad ngan diri na kinahanglan nga makig tunga han budget ha pito pa nga mga munisipalidad.
Sumala pa hini, ngan an syudad hiton Tacloban in diri na aada ha ilarom hiton probinsya hiton Leyte mahitungod nga basar ha local government code, an syudad hiton Tacloban in nakailarom na ha Highly Urbanized City tikang pa han Disyembre 18, 2008 ngan sakob gihapon iton Tacloban ha mga resikitos agud magin Lone District.
Kanit hini, an syudad han Tacloban in diri na sakop ha bisan ano nga aspeto hin panmamangulo han probinsya han Leyte kundi kaparehos na ini ha rehiyon 8.
Pag klaro naman han alkalde ha publiko nga an sakto nga address han syudad in Tacloban City, Philippines ngan diri Tacloban City, Leyte, Philippines.
Samtang, gin duduso pa han alkalde nga mas maupay nga bulag na an syudad han Tacloban ha probinsya han Leyte agud mas mapadagmit an progreso ngan mas matagan pa hin trabaho an mga mplupyo nga nanginginahanglan nga tikang pa ha magkadurudilain nga lugar mahitungod nga an syudad in nagseserbi man kumo financial center han katawhan.
