TACLOBAN CITY – Nagpahimatngon an city government han Tacloban ha mga nagbabaligya hin baratilyo nga dire okuparan an karsarda o dalan pakadto ha RTR Plaza ngan ha may City Engineers Office gym agud nga malikayan an pagbugiot han mga sarakyan ngan mga katawhan.
Sumala kan Ronie Cornico, Executive assistant III City Mayor’s Office, an wala o left side la han karsada an pwede nga gamiton ha mao nga area han mga namamagtindog hin mga baratilyo agud nga dire makaulang.
Dugang pa han mao nga opsiyal, nga kasagaran mangud nga natatabo han waray pa bumutho an pandemya duha katuig na an nakakalabay in gintitindugan han mga namagtitinda han baratilyo an wala ngan tuo nga parte han karsada ha may dapit RTR Plaza hiton syudad.
Mababaruan nga dire la mga paninda nga baratilyo an namamag-install na han ira mga paninda, kalakip na gihapon dinhe an mga nagbabaligya hin street foods, nga numero uno nga masurong ilabi na ha mga namamasyada ngan namagkikita han mga aktibidadis nga ginmugna hiton syudad kasumpay na gihapon ha nagtitikahirani nga kapatrunan han Tacloban.
