TACLOBAN CITY – Nagdudumara iton City Nutrition Office han syudad han Tacloban, hin Livelihood Skills Training ha mga nanay nga mayda mga anak nga underweight iton timbang.
Sumala kan Malou Tabao, Head hiton City Nutrition Office han Tacloban City, gin paprayoridad nira an paghatag hin mga skills training ha mga nanay nga mayda nga underweight nga anak agud makabulig para madugngan an income han mga ine ngan makapalit hin sakto nga pagkaon.
Usa ha mga rason han pagigin underweight han usa nga bata in mahitungod nga waray ine sakto o kulang ine ha pagkaon, mahitungod gihapon nga kulang an ginpapalit han mga kag-anak hiton pagkaon.
Panuyo han nasabi nga programa, nga tutduan an mga nanay o kag-anak nga magkamay-ada hin kadugangan nga income pinaagi han paghatag hin mga skills training ha mga ine.
Makakabulig daw gihapon an nasabi nga programa para ma-empower an mga nanay, nga akos gihapon han mga ine nga makabulig para han paghatag han mga panginahanglanon han ira pamilya ngan sugadman an pagdugang han income han pamilya.
Damu naman nga mga skills training an ginhahatag han nasabi nga buhatan, sugad nala han food processing, rag-making, peanut butter-making, ngan iba pa.
Kaupod gihapon han mga ine an City COOP ha paghahatag han nga livelihood skills training ha mga nanay, kun diin nagdudumara gihapon an nga ine han nasabi nga training ha mga pili nga lugar hiton syudad.
