TACLOBAN CITY– Igin anunsyo han Lokal nga Panggobyernuhan han Alangalang, Leyte nga nabalik na utro an ira festival nga kilala nga Lingganay Festival yana nga tuig ngan mabulig ha Pintados Festival nga pagbubuhaton naman kumo kaparte han selebrasyon han syudad han Tacloban yana nga bulan hitun Hunyo.
Sumala kan Alangalang, Leyte Councilor Kent Jefflor Guillermo, Committee Chair on Tourism, nga nagpapadayon na an ira ginbubuhat nga pangandaman sugad nala hitun pagpoporma han mga magigin steps, props ngan iba pa nga pagkikinahanglanon han Lingganay Festival.
Katapusan nga umapi hira dida han 2015 nga kun diin, waray na ini kasundi pa, sanglit puno hin kalipay an mga kaparte han mao nga festival nga yana nga tuig in hira in nabalik.
Maabot naman ha 80 nga mga dancers an kaapi ngan inin hira in ginpapagplanuhan han Lokal nga Panggobyernuhan han Alangalang nga tagan hin insentibo an mga dancers nga kaapi.
Dugang pa ni Guillermo nga ira igpapakita ha ira dance rituals an panginabuhi han mga Alangalanganon nga pag uuma.
Manunumduman makadamo na ka beses nga umapi an Lingganay ha Pintados- Kasadyaan Festival, Sinulog ngan ha Aliwan.
