TACLOBAN CITY – Limitahan la ha paggamit han social media platforms an mga kabataan ngan dire ig total ban, ini in sumala kan ACLC Tacloban College Dean, Dr. Cesar Silay.
Dugang pa hini, kinahanglan nga magkamay-ada hin klaro nga polisiya ha pagpapatuman han iginduduso nga ‘ban,’ sugadman hin maupay nga kumunikasyon han gobyerno ngadto ha mga iskuylahan, concerned agencies, ngan ha tag-iya mismo han platform agud makabug-os hin maupay nga sabot.
Ginmalatumat pa ni Silay nga kun igpatuman man an ginduduso nga balaod, in kinahanglang magkamay-ada hin alternatibo nga plataporma kun diin pwede mag-istorya an pamilya o makipag-kumunikasyon an kabataan ha ira kag-anak.
Kaurugan manggud han kabataan yana nga panahon in mga ‘expose’ na ha social media ngan waray limitasyon ha mga nakikit-an hini nga content, sanglit nagigin dako gihapon nga parte an social media ha pag-impluwensiya han mga kabataan.
Iginduduso nira CIBAC party-list Rep. Eddie Villanueva ngan Cavite Rep.Lani Mercado-Revilla an House Bill 8262 o Social Media Protection for Minors Act ngan House Bill 7300 o Social Media Accountability Act.
Panuyo han nasabi nga mga balaudnon nga proteheran an kabataan nga nag-eedad 16-anyos paubos tikang ha adiksyon, cyberbullying, ngan pagka-expose ha mga dire maupay nga kiritaon. Lakip naman ha mga iginduduso nga igbawal nga platform an Facebook ngan Tiktok.
Mababaruan nga dire na bag-o an pag-‘ban’ ha paggamit han social media ha mga kabataan mahitungod nga damo na gihapon nga nasud sugad han Australia, France, ngan Spain an nagpatuman hira ha ira mga kabataan ng istudyante.
