Pormal nga gin rekomenda han Department of Public Works and Highways (DPWH) ha Philippine Competition Commission (PCC) an duha nga kaso han bid manipulation ngan bid rigging para ha imbestigasyon ngan posible nga pagpasaka han kaso.
Kaupod ha syahan nga kaso han Wawao Builders, IM Construction Corporation, SYMS Construction Trading, St. Timothy Construction Corporation, ngan pira nga opisyal han DPWH Bulacan 1st District Engineering Office nga daw dabi ha iregularidad ha mga flood control projects.
Ha ikaduha nga kaso, iginsumpay naman an Sunwest Inc. ngan mga opisyal han DPWH Regional Office IV-B mahitungod ha pagpapadayon han mga proyekto ha Oriental Mindoro ha kaluyo han nakit-an nga anomaliya.
Sumala kan DPWH Undersecretary Ricardo Bernabe, subay ha mga ebidensya tikang ha mga pagdungog ha Senado ngan Kamara, ngan ha report han COA ngan DPWH, may nakit-an an mga ine nga ‘red flags’ ha proseso han bidding pero nagdaog la gihapon an parehas nga kontratista.
Ginbabana-ban nga maabot ha P2.3 bilyon an posible nga multa ha lima nga kontratista kun mapapamatud-an nga salaan an mga ine.
