TACLOBAN CITY – Mas ginpahuruhugot han Local government unit (LGU) han Catbalogan, Samar an ginpapatuman nga community quarantine ha mao nga lugar.
Partikular na dinhi an pag striko han maabot 21 nga barangay nga kun diin mayda hitaas nga kaso han COVID-19.
Ha ginpalusad nga mandatu ni Catbalogan Mayor Dexter Uy, tulo nga barangay dinhi an ginpailarum ha enhanced community quarantine (ECQ), 10 ha ilarum han modified ECQ, upat ha ilarum han general community quarantine (GCQ), ngan upat ginbutang ha modified GCQ.
Ini nga EO in epektibo tikang August 19 kutob September 3.
An nahitabo nga Local transmission hiton COVID 19 an nagduso ha local government unit han Catbalogan nga igpailarom ha iba iba nga level hin movement restrictions an ira mga barangay para masiguro nga masusunod an mga ginpapatuman nga minimum health standards.
Tanan nga mga otorisado nga mga tawo ha gawas han bungto in dapat may dara nga quarantine pass.
Ginbabawal la anay liwat an pagdumara hin mga non essential transactions ngan mga aktibidad.
Tanan nga mga residente in ginrerequire nga pagsul-ot hin face mask ngan pagface shield ha mga pampubliko nga lugar hilabi na kun nasakay sugad man an pag obserba han physical distancing.
