TACLOBAN CITY – Plano igduso yana han Leyte Division han Department of Education ha Provincial Government han Leyte nga magkaada hin mga incentives nga makakarawat han mga atleta nga nagrerepresentar han probinsya han Leyte ha mga sports events.
Kun mahihinumduman, in han una nga panahon in mayda naihahatag nga mga insintibo nga para ha mga atleta pero tungod han sitwasyon labi na an nagin epekto han Covid-19 in nakukurian pa an gobyerno.
Sumala kan Dr. Mariza Magan, Schools Division Superintendent han Leyte Division, nga itun budget nga ginpagawas han Leyte para han yana nga EVRAA Meet in P4.1 M nga kun diin, nakaalutaga ini para ha pagkaon ngan uniform han mga atleta nga magrerepresentar han probinsya, ngan sobra hini in para liwat ha transportasyon.
Nangaro naman hin pag intindi hi Magan ha publiko mahitungod nga kababalhin pa la hini niya ha Leyte Division sano an pagdudumara han EVRAA Meet 2023, pero pagpatapod hini nga ginbuhat nira nga tanan para masolusyunan an mga problema.
Dugang pa hini nga damo manggud an ginpag gastusan han Leyte in labi na nga usa hira ha mga host han EVRAA 2023 sugad nala han pagpapaupay ngan pagpapahusay han Leyte Sports Development Center o kun Grandstand nga gagamiton han mao nga paisan-isan.
