Mahugot nga ginkwestiyon ni anay Senate President Pro Tempore Loren Legarda an pagprubar nga pagbalyo han liderato ha Senado gamit la an 12 nga botos dida han Miyerkules, Hunyo 3, ngan ginduon nga pagtalapas ha Konstitusyon nga ha mga aludayday han Senado.
Manunumduman nga kakulop ha plenary session, gindtudlok han mga senador tikang ha minority bloc kaupod hi Sen. Francis “Chiz” Escudero tikang ha majority bloc hi Senador Sherwin Gatchalian kumo bag-o nga Senate President Pro Tempore ngan acting Senate President, mahuman nga waray umatender an pira nga senador tikang ha majority bloc.
Ha ginpagawas nga pahayag, ginmalatumat ni Legarda nga waray senador an puydi mahurar o magin Senate President kun waray an kinahanglan nga mayorya han botos han bug-os nga miyembro han Senado.
Gintagan pagklaro gihapon niya nga ha Article VI, Section 16(1) han 1987 Constitution nga an Senate President in dapat mahurar ha pamamaagi han mayorya nga botos han tanan nga miyembro han Senado.
Gineksplikar gihapon han senador nga magin an iba pa nga opisyal han Senado sugad han Senate President Pro Tempore, Senate Secretary, ngan Sergeant-at-Arms in kinahanglan gihapon hin dire maubos 13 nga botos agud mahurar kasunod ha Senate Rules.
