Mahugot nga igin diwara han kampo ni Senator Ronald “Bato” dela Rosa an pahayag han National Bureau of Investigation (NBI) an paglaladawan ha senador kumo “armado at mapanganib,” kadungan han pagklaro nga waray madig-on nga basaranan an mao nga alegasyon.
Sumala ha abogado han senador nga hi Atty. Israelito Torreon, diri matadong an mao nga paghulagway ha senador sugad man diri ini makakabulig agud maayos nga maresolba an mga isyu nga gin kakaatubang han mambaralaod.
Gin duon pa hini nga an senador in usa nga igin tudlok nga opisyal han mga Pilipino nga na gios hin mahinahon ngan nasunod hin sakto ha iya mga responsibilidad kumo opisyal.
Ha lain nga bahin, igin malatumat han NBI nga kaparte an mao nga pitad han standard operational protocol ha mga operasyon han ahensya kontra ha mga indibidwal nga ginbibiling han bala-od.
Samtang, nanawagan naman an kampo ni Dela Rosa ha mga otoridad nga magpakita hin pasensya samtang ginhuhulat an magigin desisyon han Korte Suprema kasumpay han ira igin salawad nga mosyon agud baliktaron an nahauna na nga desisyon na han pagdiwara han interim relief.
Manunumduman nga hi dela Rosa in na atubang hin warrant tikang ha International Criminal Court (ICC) mahuman ini tudlokon kumo usa nga co-perpetrator ni anay Pangulong Rodrigo Duterte ha madugo nga kampanya kontra ilegal nga droga dida han iya administrasyon.
