Utro nga ginpamatud-an ni Lebron James an iya waray kapantay nga kakarit ha pantag han basketball mahuman niya buongan an rekord para ha pinakadamo nga mulay nga namulay ha regular season ha kasaysayan han
National Basketball Association (NBA).
Nakab-ot han 41-anyos nga superstar an iya ika-1,612 nga mulay ha daog han Los Angeles Lakers kontra Orlando Magic, kun diin nalahusan ni James an anay rekord nga 1,611 nga mulay nga kapot ni Robert Parish tikang pa dida han 1997.
Ubusay pa nga masapawan an pagkaperdi an makasaysayanon nga gab-i ni James han manguna an Orlando, 104-102 nga mayda nabibilin nga tulo kasegundos ha mulay.
Pero nagdaog an Lakers pinaai han clutch nga three-pointer ni Luke Kennard ha urhi ng segundo han mulay. Mahitunagod hini, humitaas an Lakers ha rekord nga 46-25 ngan labi pa nga ginpadig-on an ira kapot ha ikatulo nga pwesto haWestern Conference.
Bisan man kun waray ini manguna ha scoring, nag-amot hi James han 12 puntos, 6 rebounds, ngan 4 assists ha makasaysayanon nga mulay.
Ginpangunahan naman ni Luka Dončić an Lakers ha iya 33 points, samtang hi Austin Reaves in nagdugang hin 26 points.
Samtang, para kan James, an paghipatik hin bag-o nga rekord in bunga han iya dedikasyon nga magpabilin nga makusog para ha iya koponan ha sulod han sobra duha kadekada.
