TACLOBAN CITY – Samaran an usa nga lalaki mahuman matabo an insidente han panawtaw ha Sitio Malaihao, Brgy. Bahay, San Miguel Leyte.
Ginkilala an suspek kan Mario Tabada, ada ha legal nga pangidaron, parag-uma, ngan residente han nasabi nga barangay, samtang an biktima naman in ginkilala kan Marcelino Lase, 54-anyos an pangidaron, ngan residente gihapon han nasabi nga barangay.
Sumala kan PMaj. Ronald Espina, Chief of Police hiton San Miguel Municipal Police Station, magbayaw la an suspek ngan biktima kun diin dire pagkakaintidihan an rason han panawtaw han suspek ha biktima.
Basar han inisyal nga imbestigasyon, tikang ha usa nga handaan an biktima ngan nakainom-inom hin makahurubog nga irimnon han kumadto ine ha balay han suspek kun diin nagkamay-ada naman ine hin mapaso nga argumento.
Gin unahan daw pagbalbag an suspek hiton biktima pero nakalikay ine, rason liwat nga nakuha hiton suspek an iya sundang ngan ginbulos an biktima nga nag-angkon hin samad ha wala nga parte hiton agtang hine. Dida naman ha katumba na han biktima in ginpananawtaw pa hine hiton suspek gamit an sundang hine.
Dayun naman nga gindara ha hospital an biktima agud matambal dayun, samtang, nadakop naman an suspek ngan nakapaslak ine ha San Miguel Municipal Police Station.
Hapagkyana papasakahan naman hin kaso nga frustrated homicide an suspek.
