TACLOBAN CITY- Patay an usa nga lalaki mahuman nga nag intrimis ha usa nga hubog harani ha Naval public slaughterhouse nga namumutang ha Sto. Rosario, Naval, Biliran.
Guinkilala an biktima nga hi Noel Villamil samtang guinkilala naman an suspek nga hi Armand Brane, 26 anyos an pangidaron, ulitawo ngan usa nga butcher.
Sumala ha blotter han Naval PNP nga hubog an suspek dida han guin intrimisan ini han biktima nga nagresulta hin mahugot nga argumento ngan panbuno.
Nahisabutan nga ikadamo ka higayon nga guinbuno-buno han suspek an magkadirudilain nga parte han lawas han biktima gamit an usa nga kutsilyo nga nagresulta han dagmit nga kamatayon hini.
Dayon naman nga nadakop han mga kapulisan an mao nga suspek ngan nakatalaan nga pasakahan hin kaangayan nga kaso han pamilya han biktima.
