TACLOBAN CITY – Patay an usa nga biktima mahuman nga pagpusilon ine samtang nag-aayad han baluto.
Ginkilala an mga biktima kanda Antonio Morales, parag-uma ngan residente han Brgy. Sibunot, Laoang Northern Samar ngan Jeffrey Morales, 24 anyos an pangidaron, parag-uma ngan residente han nasabi nga barangay.
Samtang ginkilala naman an suspek kan Christian Cerujano, 27 anyos an pangidaron, usa nga security guard ngan residente han Brgy. Sibunot, Laoang Northern Samar.
Sumala kan PMaj. Ricardo Banjawan, Chief of Police han Laoang Municipal Police Station, ginpusil an biktima nga hi Antonio ha nawong rason han dayun hine nga kamatayon samtang ginpabuthan naman an anak hine nga hi Jeffrey pero waray ine maigo.
Basar han imbestigasyon han kapulisan, umiskapo dayun an suspek mahuman an pamusil hine kun diin ginlabog daw hine ha waray pa hasibti nga direksyon an pusil nga ginamit.
Dayun naman nga nadakop an suspek mahuman an ginbuhat nga hot pursuit operation han mga kapulisan.
Ha pagkayana in aada na ha kostudiya han pulisya an suspek ngan igpapailarom ine ha crime laboratory.
