TACLOBAN CITY – Arestado an usa nga lalaki nga nabisita ha presuhan mahuman nga makuhaan hin shabu ha Leyte Regional Prison, Brgy. Cagbolo, Abuyog, Leyte.
Ginkilala an suspek kan Jay Paul Grefeil, 28-anyos an pangidaron, ngan residente han Brgy. 37 Reclamation Area, Tacloban City.
Sumala kan PMaj. Luis Hatton, Chief of Police hiton Abuyog Municipal Police Station, nakuhaan an suspek han gin aalegar nga shabu mahuman nga magdumara hin inspection an mga gate officers ha dara hine nga gamit.
Nakuha naman ha suspek an usa kapakete kun diin ginsuksok ine ha sulod han tsinelas hine; mayda naman ine estimated market value nga P25,800.
Dayon naman nga gindara an suspek ha Abuyog Municipal Police Station, para kaatubangon an kaso pagtalapas ha Comprehensive Dangerous Drug Act of 2002 han RA 9165.
