Usa nga 24-anyos nga lalaki an nakaghipatik hin world record mahuman niya bug-uson an duha nga Rubik’s cube samtang nakadto ha kalangitan ha iya pinakasyahan nga eksperyensya ha pag-skydiving.
Malinangpuson nga nakuha ni Ishaan Hadkar an Guiness World Record para ha ‘most rotating puzzle cubes solved in a single skydive’ mahuman hiya lumukso tikang ha kahitaas nga 13,000 feet.
Dire nagin madali an challenge para kan Hadkar, nga nagbubug-os na hin mga puzzle cubes tikang pa dida han 10-anyos pala hiya. Ha iya paglukso, nga amu gihapon an iya syahan nga beses mag-skydive, in nabuong an usa nga cube samtang nakadto ha kalangitan. Imbes nga sumurender, dayun hiya nga sumakay utro ha eroplano ngan utro nga nagprubar ha sumunod nga minuto.
Sumala kan Hadkar, nagin dako nga ayat an paglukso mahitungod ha kalaksi nga 120 mph freefall ngan ha mahangin ngan madampog nga panahon, sanglit ginkinahanglan niya kaptan hin mas mahugot an mga cubes kumpara ha normal nga pagbug-os niya ha tuna.
Malinangpuson niya nga nabug-os an syahan nga cube samtang naka-freefall ngan an ikaduha naman in samtang nakabitay ha iya parachute.
Bisan man kun duro an iya kalipay nga maaprubahan an iya rekord kumo usa nga dako nga kalangpusan ha iya 14 katuig nga pagmumulay hin Rubik’s cube, intrimis niya nga ginpahayag pagka-lapag niya ha tuna, syahan nga sumulod ha iya huna-huna nga kaya pa niya magbug-os hin lima nga cubes samtang nakadto ha kalangitan.
