JARO, LEYTE – Patay an usa nga lalaki ha Brgy. San Pedro, Jaro, Leyte han mapusil han iya kumpadre mahuman nga mapagkamalan nga baboy halas.
Ginkilala an biktima kan alyas Jun, 31-anyos, parag-uma, samtang an suspek naman in ginkilala kan alyas Haping, 43-anyos an pangidaron, ngan parehas residente han nasabi nga barangay.
Sumala kan Jaro Municipal Police Station Chief of Police, PMaj. Ronald Puso, kumadto ha kabukiran han nasabi nga lugar an biktima kaupod an duha pa hine nga kumpadre para manakop hin baboy halas.
Han nakadto na hira ha bukid, umiba hin ruta an biktima para unta han mas dako nga tyansa nga makadakop an mga ine.
Paghagos han pira kaoras, napansin han suspek nga may nagkarasikas kun diin ha paghuna hine nga baboy halas na ine, ginpusil ine niya dayun gamit an improvised shotgun.
Dida han pagdaupa na hine han iya pinusil in nahikalasan ine mahitungod nga dire ngay-an ine baboy halas kundi an iya kumpadre nga hi alyas Jun.
Nag-angkon hin usa nga igo ha li-og an biktima kun diin gindara pa ine ha ospital pero gindeklara na ine nga dead-on-arrival.
Samtang, mahuman nga mahisabtan han suspek nga napusil niya hi alyas Jun in ginsugo hine an ira usa pa nga upod nga hi alyas Mario nga pumakadto ha kapulisan ngan magsumat ha nahitabo ngan maghuhulat la hiya han pag-abot han mga kapulisan.
Pag-abot han mga kapulisan in boluntaryo naman ine nga nagsurender ha mga otoridad.
Desidido naman an pamilya han biktima nga magpasaka hin kaso ha suspek.
