TACLOBAN CITY — Ginpusil-patay an usa nga lalake nga aada ha sakto nga pangidaron han waray makilal-i nga mga suspek ha Brgy. Hiangaban Dagami, Leyte.
An biktima in kinilala kan Rodgen Cabaltera, aada ha sakto nga pangidaron ngan usa nga laborer.
Sumala kan PMaj. Dennis Gatela, Chief of Police han Dagami MPS, basar ha inisyal nga imbestigasyon, an biktima ngan kaupod hini in sakay ha usa nga single motorcycle tikang ha ira trabaho ha Brgy. Sirab han mao la nga lugar.
Basar naman ha pahayag han backrider han biktima, dayon hiya nakaeskapo mahuman nga matumba an ira ginsasakyan nga motor han pagpamumusilon ini han waray makilal-i nga mga suspek kun diin naigo an biktima.
An mga suspek ngadaw in sakay gihapon han single nga motor kun diin an backrider hini an nagdumara han panmumusil.
Dayon la naman kumalagiw an mga suspek ha iba nga direksyon.
Narekober naman han mga otoridad ha mao nga area an mga basiyo han kalibre 45 nga pusil nga gin-gamit ha panmumusil ha mga biktima.
Mababaruan nga an biktima in mayda pa dati nga mga kaso ngan nakapiyansa la ha pagkayana.
Padayon naman an pakikipagsumpayan han mga otoridad ha mga makakapagtudlok ha kinamumutangan han mga suspek sugadman ha paghihingita han motibo han mga ini ha panmumusil.
