SPORTS – Ginbaligya na an kilala nga NBA team nga Los Angeles Lakers ha kantidad nga $10 billion, an pinakamahal nga presyo para ha usa nga team ha kasaysayan han Estados Unidos.
Nahipatik nga an Buss family an nakapot han Lakers ha sakob han 47 ka-tuig, in nagbaligya han ira kontrol ha koponan kan billionaire Mark Walter, usa nga presente nga minority owner han team ngan CEO han TWG Global.
Magpapabilin la gihapon nga team governor hi Jeanie Buss mahuman an pagbaligya han nasabi nga NBA team.
Samtang, hi Walter in nagtatag-iya gihapon han Los Angeles Dodgers, Los Angeles Sparks, ngan iba pa nga propyedad han sports.
Sumala kan NBA legend nga hi Magic Johnson, maupay ini nga notisya para han Lakers tungod nga hi Walter in mayda reputasyon ngan kasaysayan hin pagdaog ngan liderato.
Mahinunumduman nga an pamilya Buss in nakadala hin 11 ka NBA championship ngadto han Lakers tikang han tuig 1979, lakip na an mga panahon nga ginpangunahan hini nira Magic Johnson ngan Kobe Bryant.
