METRO MANILA – Utro nga nagkamayda hin mapaso nga diskusyon ha plenaryo han Senado hira Senador Panfilo Lacson ngan Senador Rodante Marcoleta mahuman nga ginmalatumat ni Marcoleta an kawaray opisyal nga committee report kutob yana may paghisumpay ini han serye han mga pagdungog han Senate Blue Ribbon Committee hiunong han mga anomaliya ha mga flood control project ha nasud.
Sumala kan Lacson, natagan na hin inisyal nga report an kada senador, kun diin an kada-tagsa in may-ada kalugaringon nga kopya nga may watermark han ira kalugaringon nga mga opisina. Ginbuhat ini han iya opisina agud malikyan an pag-leak han inisyal nga report han komite.
Baton naman ni Marcoleta, nga may-ada pira nga kakulangan ha report han komite ni Lacson, partikular na an kawaray han mga importante nga ngaran sugad kan Adrian Bersamin, nga anay nga nagsirbi nga Undersecretary ngan nagmangulo han Presidential Legislative Liaison Office (PLLO).
Ginhalungkat pa ni Sen. Marcoleta, an daw pagpipirit han iya mga igkasi senador sugad kan Sen. Panfilo Lacson nga hiya in pro-China.
Ha utro nga pag-atubang nira Lacson ngan Marcoleta ha plenaryo han Senado, ginmalatumat ni Marcoleta nga magpapatawag hiya hin hearing ha March 12 kasumpay ini ha isyu han West Philippine Sea.
