Bumwelta hi Senador Panfilo “Ping” Lacson kan Senate President Alan Peter Cayetano kasumpay han istoryahon ha pagbabag-o han Senate Rules.
Ha usa nga pahayag, gintagan-duon ni Lacson nga waray sayop ha pagdedebate ha mga panukala han pababag-o. An sayop daw in an pagbaliwaray ha kalugaringon nga patakaran ngan parliamentary procedures han Senado pinaagi han pag-pugong ha mga debate para la mapadagmit an pag-adopt ha mosyon nga nai-refer na ha Committee on Rules.
Ini an nagin baton ni Lacson mahuman igpakiana ni Cayetano ha iya Facebook livestream kun maraot ba pag-istoryahan an pagbabag-o ha patakaran han Senado. Gin klaro gihapon han Senate President nga dire pa ginbobotosan an mismo nga pag-amyenda ha Senate rules nga magtutugot ha teleconferencing o online voting.
Pag-eskplikar hini, an nagin botosay dida han nakalabay nga sesyon in kasumpay la ha mosyon kun angay ba paghingadayan ha plenaryo an nasabi nga panukala.
Ha usa nga bulag nga pahayag, igin duon ni Lacson nga bisan man kun pwede amyendahan an mga patakaran, kinahanglan la gihapon sundon an sakto nga proseso. Gin kwestyon hini nga baga-baga hin karuyag han mayorya nga nga bag-uhon an rules pinaagi han “fastbreak-style.” Sumala ha senador, tarihas ini ha sistema han Senado mahitungod nga ha ilarom han Section 24 han Senate Rules, an mga komite an mayda mandato nga maghingaday, magdesisyon, ngan magsalawad hin report kasumpay ha mga istoryahon nga igindaop ha ira.
“Pwedeng amyendahan pero sundan natin ang procedure. Gusto niya amyendahan pero fastbreak… Kaya nga may committee system. Ang Kongreso di maka-function without committees,” pag-eksplikar pa han senador.
