NATIONAL NEWS– Bumaribad hi Vice President Sara Duterte nga batunon an mga pamakiana nga may kalabutan ha isyu han confidential funds hiton Office of the Vice President.
Sumala kan Duterte, dire angay nga paki-anhan hiya kasumpay han nasabi nga pondo matungod nga an panuyo han hearing in para ha 2025 budget han ira opisina kun diin maabot ha P2-billion ngan waray kalabutan an 2025 confidential funds.
Ine an nagin baton ni Duterte ha pamakiana ni ACT Teachers party-list Rep. France Castro nga may kalabutan ha notice of disallowance nga ginrepresintar ha Commission on Audit ha nasabi nga hearing.
Ha gindumara nga hearing, han House Committee on Appropriations, ginpakita han COA an gin-isyu hine nga notice of disallowance ha P73 million nga kantidad han confidential funds nga gingastos han Office of Vice President hadton 2022.
